Viltu taka þátt í Vísindavöku 2011?

Vísindavaka 2011 – stefnumót við fræðimenn verður haldin föstudaginn 23. september nk. í Háskólabíói.

Stofnanir, háskólar og fyrirtæki sem hafa áhuga á að taka þátt í Vísindavöku geta nálgast kynningarbréf og skráningarblað hér.

Í ár hefur Vísindavöku Rannís verið boðið að vera í samstarfi við 100 ára afmæli Háskóla Íslands. Háskólabíó er nýr og spennandi staður fyrir vökuna, sem býður bæði upp á hefðbundið sýningarsvæði en einnig bíósalina, sem verða nýttir til að auka enn á fjölbreytni lifandi vísindamiðlunar á sviði.

Þeir sem hafa áhuga á að taka þátt í Vísindavöku 2011 skulu senda skráningarblað fyrir 30. ágúst til Aðalheiðar Jónsdóttur kynningarstjóra Rannís í netfnagið [e-mail]. Í kjölfarið verður haft samband við þátttakendur varðandi nánari útfærslu.

Aldrei fleiri á Vísindavöku!

Vísindavaka Rannís 2010 var haldin föstudaginn 24. sept. sl. og mættu 4200 gestir á vökuna. Gestir Vísindavöku fengu tækifæri til að hitta vísindamenn og fræðifólk úr öllum fræðigreinum frá háskólum, rannsóknastofnunum og fyrirtækjum, sem sögðu frá rannsóknum sínum og viðfangsefnum á skemmtilegan og lifandi hátt. Rannís þakkar sýnendum fyrir þeirra framlag og gestum fyrir komuna. Sjáumst á Vísindavöku 2011!

Til hamingju með daginn vísindamenn!

Vísindavaka Rannís er haldin föstudaginn 24. september kl. 17-22 á Degi evrópska vísindamannsins. Vísindavaka er haldin í flestum borgum Evrópu á sama tíma og markmiðið er að færa vísindin nær almenningi og gefa fólki kost á að spjalla við fræðimenn um rannsóknir þeirra og viðfangsefni. Um 70 sýningarbásar eru á Vísindavöku 2010, lifandi vísindamiðlun verður á sviði, auk þess sem vísindasmiðja verður fyrir börn. Sprengjugengið mætír á svæðið, boðið verður í stjörnuskoðun, Vísindavefurinn spurður út úr og súkkulaði sent um internetið. Vísindavaka Rannís er fyrir alla fjölskylduna! Dagskráin og listi sýnenda hér.

Vísindakaffin fara vel af stað

Fyrsta Vísindakaffi Vísindavöku var í gær og mættu 90 manns til að heyra Pál Einarsson jarðeðlisfræðing við HÍ segja frá hvar muni gjósa næst. Vísindakaffið í kvöld, þriðjudag 21. sept., fjallar um hvað á að vera í stjórnarskrá og hvers vegna, og verður það Ragnhildur Helgadóttir prófessor við lagadeild HR sem fræðir okkur um það.

Vísindakaffin eru á Súfistanum, Máli og menningu Laugavegi kl. 20-21.30. Komið í Vísindakaffi og fáið ykkur kvöldkaffi með Rannís í aðdraganda Vísindavöku

Dagskrá Vísindakaffis Vísindavöku 2010

Áhugasamir um rannsóknir og fræði hvurs konar ættu ekki að láta Vísindakaffi Rannís fram hjá sér fara, en í aðdraganda Vísindavöku er hellt upp á fjögur Vísindakaffi á Súfistanum í Máli og menningu á Laugavegi, 20., 21., 22. og 23. september, kl. 20-21:30 hvert kvöld. Umræðuefni fræðifólksins, sem tekur þátt að þessu sinni, tekur nokkuð mið af umræðunni í þjóðfélaginu, en efni kaffana eru eldfjöll, stjórnarskrár, stofnfrumurannsóknir og þjóðardýrðlingar. Hér er dagskrá vikunnar á Súfistanum:

 

Vísindakaffi 2010

Dagskrá á Súfistanum í Máli og menningu, Reykjavík:

Mánudagur 20. september, kl. 29-21:30
Eldfjöll - hvar gýs næst?
Páll Einarsson prófessor í jarðeðlisfræði fjallar um aðferðir til að fylgjast með virkni eldfjalla og segja fyrir um hegðun þeirra. Af hverju er stundum hægt að spá og stundum ekki?

Þriðjudagur 21. september, kl. 20-21:30
Hvað á að vera í stjórnarskrá?
Stjórnarskrár landa geta fjallað um allt milli himins og jarðar. Í tilefni stjórnlagaþings og endurskoðunar stjórnarskrár ræðir dr. Ragnhildur Helgadóttir, prófessor við lagadeild Háskólans í Reykjavík, um það hvað á að vera í stjórnarskrám og hvers vegna.

Miðvikudagur 22. september, kl. 20-21:30 
Stofnfrumur - tækifæri eða tálsýn? 
Dr. Sveinn Guðmundsson yfirlæknir Blóðbankans og dr. Ólafur E. Sigurjónsson forstöðumaður stofnfrumuvinnslu og grunnrannsókna í Blóðbankanum fjalla um eiginleika stofnfrumna, skýra muninn á "stofnfrumum úr fósturvísum" og "vefjasértækum stofnfrumum", kynna notkun blóðmyndandi stofnfrumna í læknisfræðilegri meðferð, ræða og vara við oftrú á "galdramætti" stofnfrumna í nútíma læknisfræði; en kynna jafnframt not blóðmyndandi stofnfrumna t.d. með stofnfrumugjafaskrám og naflastrengsbönkum.

Fimmtudagur 23. september, kl. 20-21:30
Hver eru sameiningartákn íslensku þjóðarinnar? Frá Njáli Þorgeirssyni til Helga Hóseassonar
Jón Karl Helgason dósent við Íslensku- og menningardeild Háskóla Íslands fjallar um hvernig ýmsar persónur úr íslenskri sögu og bókmenntum hafa í ákveðinn tíma orðið fulltrúar þjóðarinnar allrar eða tiltekinna hópa. Meðal þess sem ber á góma eru styttur og minnismerki í Reykjavík, rithöfundasöfn á landsbyggðinni, götuheiti og íslenskir peningaseðlar.

Vísindavaka um alla Evrópu

Vísindavaka Rannís er hluti af samevrópsku verkefni og er haldin í tilefni af Degi evrópska vísindamannsins og kallast "Researchers' Night". Á sama tíma og við skemmtum okkur og fræðumst í Hafnarhúsinu 24. sept nk., eru sams konar viðburðir haldnir út um alla Evrópu.

Undirbúningur Vísindavöku 2010 kominn á fullt

Vísindavaka 2010 verður föstudaginn 24. september 2010 í Listasafni Reykjavíkur Hafnarhúsinu kl. 17-22. Á Vísindavöku Rannís finna allir eitthvað við sitt hæfi og sérstök áhersla verður lögð á að ná til fjölskyldna, barna og ungmenna. Missið ekki af fjörugri fræðslu! www.rannis.is

Vísindavaka slær í gegn

Vísindavaka 2009 sló öll aðsóknarmet, aldrei hafa fleiri gestir sótt vökuna heim til að kynna sér viðfangsefni jafnmargra vísinda- og fræðimanna, en 2.790 manns komu á Vísindavökuna á föstudaginn var. Rannís þakkar sýnendum, styrktaraðilum og samstarfsaðilum fyrir frábæra samvinnu. Sjáumst á Vísindavöku 2010!

Til hamingju með daginn, vísinda- og fræðimenn!

Vísindavaka er í dag föstudaginn 25. september í tilefni af Degi evrópska vísindamannsins og er hún haldin á sama tíma í helstu borgum Evrópu. Vísindavakan verður í Listasafni Reykjavíkur Hafnarhúsinu kl. 17-22. Menntamálaráðherra, Katrín Jakobsdóttir, opnar Vísindavöku og afhendir verðlaun í teiknisamkeppni barna og síðan hefjast atriði á sviði þar sem Sprengjugengið, Vísindavefurinn og Stjörnuskoðunarfélag Seltjarnarness mæta meðal annarra. Sýnendur hafa aldrei verið fleiri og mun fjöldi gesta sækja Vísindavökuna þannig að búast má við þröng á þingi! Það er greinilega mikill hugur í vísinda- og fræðimönnum þjóðarinnar og mikil gróska í rannsókna- og nýsköpunarstarfi.

Forvarnir í læknisfræði - Góðmennska á villigötum?

Dr. Jóhann Ágúst Sigurðsson yfirlæknir Þróunarstofu Heilsugæslu höfuðborgarsvæðisins og Dr. Linn Getz trúnaðarlæknir á LSH og dósent við læknadeild Norwegian University of Science and Technology, velta upp spurningum um gildi forvarna á Vísindakaffi í kvöld, sem verður á Súfistanum Iðuhúsinu kl. 20:00-21:30 í kvöld.  Forvarnarstarf og heilsuvernd eru af hinu góða. Hins vegar hefur verið varað við því í virtum fagtímaritum á undanförnum árum að ýmsar heilsutengdar aðgerðir í nafni forvarna hafa verið gerðar að söluvöru og þar með heilbrigðisþjónusta að markaðstorgi þar sem megin áhersla er lögð á sölu á þjónustu til hinna frísku á kostnað þeirra veiku. Í slíkum tilvikum er gert meira úr vandamálinu en efni standa til og boðið upp á úrlausnir sem geta verið kostnaðarsamar, vafasamar eða siðferðilega umdeildar. Þessi aðferð hefur verið kennd við ,,völd góðmennskunnar" (Power of Goodness), en með því hugtaki er vísað til þeirra valda eða áhrifa sem til dæmis heilbrigðisstéttir geta fengið með því að telja fólki trú um að aðgerðir þeirra og úrlausnir séu alltaf til góðs. Líkanarannsóknir á fjölmörgum klíniskum leiðbeiningum í læknisfræði benda sterklega til þess að of mikið sé gert úr vandamálinu í þá veru að næstum allir fullorðnir verði skilgreindir sem sjúkir og þurfi að vera undir stöðugu eftirliti lækna. Hvaða afleiðingar hefur slíkt ofmat á þjóðarsálina, útgjöld til heilbrigðismála, lyfjanotkun, mannafla, verkaskiptingu heilbrigðisstétta og heilsu fólks svo eitthvað sé nefnt. Lausnirnar gagnvart einstaklingum felast m.a. í að upplýsa fólk sem mest um kosti og galla forvarna, þannig að það geti tekið virkan þátt í að hafa árif á heilsu sína.