Fjórða Vísindakaffið er í kvöld!

Fimmtudagur 25. september
Má bjóða þér sláturtertu og rabarbarakaramellur?
Sigríður Sigurjónsdóttir prófessor við Listaháskóla Íslands, Brynhildur Pálsdóttir vöruhönnuður og Guðmundur H. Gunnarsson og Irek Klonowski frá Matís þróuðu frumlegar, listrænar og girnilegar nýjungar í rannsóknasamstarfi við bændur.

Skjálfandaflói – menningarlandslag og náttúra

Vísindakaffi á Húsavík 23. septemberNokkar stofnanir á Húsavík munu sameinast um að halda Vísindakaffi nk. þriðjudag 23. september kl. 20.00 í Hvalasafninu á Húsavík. Stofnanirnar eru Fræðasetur Háskóla Íslands á Húsavík, Náttúrustofa Norðausturlands, Safnahúsið á Húsavík, Hvalasafnið á Húsavík og Þekkingarsetur Þingeyinga.  Umfjöllunarefni verður “Skjálfandaflói – menningarlandslag og náttúra”. Vísindamenn munu kynna skráningu á menningarlandslagi s.s. fiskimið og lendingar sem tengjast fiskveiðum við Skjálfanda í GIS- kortagrunn auk þess sem kynntar verða rannsóknir á sjófuglum og hvölum á flóanum. 

Dagskrá Vísindakaffis á Húsavík:

• Safnið úti í hafsauga. Daníel Borgþórsson og Sigurjón Baldur Hafsteinsson, Safnahúsinu á Húsavík.
• “Hvalatal”. Marianne Helene Rasmussen, Fræðasetri Háskóla Íslands á Húsavík.
• Stúlkan sem starir á hafið – hvalarannsóknir úr Húsavíkurvita. Helga Rakel Guðrúnardóttir, Fræðasetri Háskóla Íslands á Húsavík.
• Hvað leynist í flóanum á veturna – rannsóknir á þéttleika hvala í Skjálfanda árið um kring. Edda Elísabet Magnúsdóttir, Fræðasetri Háskóla Íslands á Húsavík.
• Hvalarannsóknir og hvalaskoðun – rannsóknir um borð í hvalaskoðunarbátum. Arianna Cecchetti, Hvalasafnið á Húsavík.
• Á mörkum láðs og lagar – sjófuglabyggðir við Skjálfanda. Aðalsteinn Örn Snæþórsson og Þorkell Lindberg Þórarinsson, Náttúrustofu Norðausturlands

Kaffistjóri verður Óli Halldórsson, Þekkingarsetri Þingeyinga.

Vísindavakan komin með vefsíðu

Vefsíða Vísindavöku hefur verið opnuð hjá Rannís. Þar eru allar nánari upplýsingar um viðburðinn sem einnig verða settar hér á blogg vökunnar. Slóðin er www.rannis.is/visindavaka

Verkefnastjóri Vísindavöku 2008 er Aðalheiður Jónsdóttir á alþjóðasviði Rannís og veitir hún fúslega allar nánari upplýsingar. Netfangið er alla (@) rannis.is

Síðasti skiladagur í dag

Í dag er síðasti skiladagur fyrir teiknisamkeppni og ljósmyndasamkeppni Vísindavöku Rannís. Ótrúlegur fjöldi teikninga hefur borist og ljóst er að grunnskólar landsins hafa tekið vel í að láta börnin tjá sig um hvernig þau upplifa vísindin í daglegu lífi. Einnig er síðasti dagurinn til að tilnefna vísindamann til vísindamiðlunarverðlauna Rannís 2008. Fyrri verðlaunahafar eru Ari Ólafsson 2006 og Ari Trausti Guðmundsson 2007.

Hvern vilt þú tilnefna?

Verðlaun RANNÍS fyrir framlag til Vísindamiðlunar 

Vísindamiðlunarverðlaun RANNÍS eru veitt einstaklingi fyrir sérstakt framlag til vísindamiðlunar. Markmiðið er að vekja athygli á mikilvægi vísindamiðlunar fyrir samfélagið. 

Verðlaun eru 500 þúsund krónur sem verða afhent á Vísindavöku 2008 sem er haldin á árlegum degi evrópskra vísindamanna föstudaginn 26. september. 

Rannís óskar eftir tilnefningum um verðlaunahafa frá hvaða sviði vísinda, tækni og fræða sem er. Með framlagi til vísindamiðlunar er átt við sérstakt framtak sem miðar að því að auka skilning og áhuga almennings á öllum aldri á vísindum og nýsköpun og mikilvægi þeirra í nútímasamfélagi. Öllum er heimilt að senda inn tilnefningar til verðlaunanna.

Með tilnefningu skal fylgja lýsing á viðkomandi framlagi. Við val á verðlaunahafa verður lagt mat á brautryðjendastarf, frumleika og þann árangur sem viðkomandi einstaklingur hefur skilað til vísindamiðlunar. 

Frestur til að skila inn tilnefningum er til 15. september 2008 

Tilnefningum má skila til RANNÍS, Laugavegi 13, 101 Reykjavík, eða með tölvupósti til [e-mail] merkt Vísindamiðlunarverðlaun. 

Dómnefnd á vegum RANNÍS mun síðan fara yfir tilnefningarnar.

Teiknisamkeppni barna

Vísindin í daglegu lífi 

Í tilefni af Vísindavöku 26. september 2008 efnir Rannís til teiknisamkeppni barna 6-9 ára og 10-12 ára. Þema keppninnar er “Hvernig hafa vísindin áhrif á daglegt líf mitt”. Markmiðið að vekja börnin til umhugsunar um þau miklu áhrif sem vísindin hafa á daglegt líf okkar allra.  

Myndir skal senda til:Teiknisamkeppni barna, Rannís, Laugavegi 13, 101 Reykjavík. Merkja þarf myndina með fullu nafni barns, aldri, heimilisfangi og símanúmeri ásamt nafni forráðamanns og netfangi. 

Verðlaun verða veitt í tveimur aldurshópum á á Vísindavöku 2008 sem haldin verður í Listasafni Reykjavíkur 26. sept. nk. Einnig verða allar myndirnar þar til sýnis  

Síðasti skiladagur er 15. september 2008 
Frekari upplýsingar veitir Aðalheiður Jónsdóttir hjá alþjóðasviði Rannís í netfangi [e-mail] eða í síma 515 5800.

Ljósmyndakeppni unga fólksins

Í tilefni af Vísindavöku 26. september 2008 efnir Rannís til ljósmyndasamkeppni meðal ungs fólks á aldrinum 13-18 ára. Efni myndanna skal vera “Vísindin í daglegu lífi”. 

Reglur og skil:
Myndum skal skila rafrænt í netfangið [e-mail] eða á geisladiskum til Rannís, Laugavegi 13, 101 Reykjavík. Nafn, kennitala, heimilisfang, netfang og símanúmer skal fylgja myndunum.

Myndir mega vera jpg. eða tif., en án layera eða maska.Síðasti skiladagur er 15. september 2008 Verðlaun verða veitt á Vísindavöku 2008 sem haldin verður í Listasafni Reykjavíkur 26. sept. nk. Einnig verða allar myndirnar þar til sýnis.

Frekari upplýsingar veitir Aðalheiður Jónsdóttir hjá alþjóðasviði Rannís, [e-mail] eða í síma 515 5800

Vísindavaka 2008 - skemmtilegur og fræðandi viðburður fyrir alla fjölskylduna

Vísindavaka verður haldin föstudaginn 26. september 2008 í Listasafni Reykjavíkur. Rannsóknamiðstöð Íslands, RANNÍS, stendur fyrir Vísindavöku en hún er haldin samtímis í helstu borgum Evrópu í tengslum við Dag vísindamannsins. Markmiðið með framtakinu er að færa vísindin nær almenningi, kynna manneskjurnar á bak við vísindin og vekja fólk til umhugsunar um mikilvægi rannsókna- og vísindastarfs í nútímasamfélagi. Verður það gert með lifandi kynningum og boðið upp á skemmtilega og fræðandi viðburði fyrir alla fjölskylduna. Allar vísindagreinar eru kynntar á Vísindavöku, hugvísindi jafnt sem raunvísindi.